Gedichte über Humor - Seite 1293

Kran unn Bagger drähnen laut,
in unserm Dorf, do werd gebaut.
Jedermann de Fortschritt seht,
wo in de Näh spaziere geht -
unn im nägschd Johr, ohne Faxe,
is unsern Ord e Schdick gewachse.
Neie Birger ziehn ball ei,
was werrn dess fer Leit wohl sei?

Mer winschen uns neie Leit dezu,
wo grad sinn wie ich unn du,
mit denne, wo merr redde kann
vun Fraa zu Fraa, vun Mann zu Mann,
gude Kumpel, uffgeschlosse,
wo sich im Dorf duun sehe losse,
gewitzte Kinner mit debei -
die sollen uns willkumme sei!

Knotterkepp unn Besserwisser,
Umstandskrämer, Dippelschisser,
Neunmolgscheite unn so Kälwer
brauch'mer net - die hemmer selwer!